Max’ed Xaaji Ibrahim Cigaal  wuxuu ku dhashay magaalada Oodweyne 15kii bsihii August, sanadkii 1928dii ee hoos iman jiray maamulkii loo yaqaannay British Somaliland ee waqooyiga dalka Soomaaliya.

Max’ed Xaaji Ibrahim Cigaal waxaa uu ahaa hoggaamiyihii ururkii xornimadoonka ee waqooyiga Soomaaliya ee la oran SYC, wuxuuna madaxka ahaa dhaqdhaqaaqyadii dhinaca siyaasadda ee ka soconayay halkaasi dabayaaqadii sanadihii 1959kii – 1960kii.

26kii bishii June, sanadkii 1960kii markii ay madaxbannaanida heleen gobollada waqooyi ee Soomaaliya, waxaa loo doortay in uu noqdo ra’iisul wasaarihii ugu horreeyay ee Somaliland, Max’ed Xaaji Ibrahim Cigaal wuxuu ka mid ahaa hoggaamiyeyaashii Soomaalida ee aasaaska u dhigay midowgii labadii gobol ee ay kala gumeysanayeen dalalka Ingiriiska & Talyaaniga & dhismihii dalka Jamhuuriyadda Soomaaliya.

Midnimadii labadii gobol ee jamhuuriyadda Soomaaliya ka dib waxaa dowladdii madaxweyne Aaden Cabdulle Cusmaan loo magacaabay Max’ed Xaaji Ibrahim Cigaal xilalka kala ah;-

1.      Wasiirka difaaca 1960kii-1962dii

2.      Wasiirkii Waxbarashada 1962dii-1963

3.      Ra’iisul wasaarihii madaxweyne C/rashiid Cali Sharmaarke ee 1967dii-1969kii.

Dilkii la dilay madaxweyne C/rashiid Cali Sharmaarke isla markaana uu MD. Max’ed Xaaji Ibrahim Cigaal ra’iisul wasaaraha ka ahaa ka dib markii uu dalka si degdeg ah ugu soo laabtay waxaa lagu xukumay xabsi guri, ka dib markii ay talada dalka afgembi aan dhiig ku daadan kula wareegeen ciidamadii qalabka sida ee Soomaaliya ee uu hoggaaminayay S/Gaas Max’ed Siyaad Barre.

Intii u dhaxeysay 1976dii-1978dii wuxuu ahaa danjirihii dowladda dhexe ee Soomaaliya u fadhin jiray dalka Hindiya, waxaana wixii ka dambeeyay intii ay talada dalka la wareegeen ciidamadii Soomaaliya muddo 2 jeer ah ayaa xabsiga loo taxaabay.

Ka dib markii la riday xukuumaddii uu madaxda ka ahaa madaxweyne Max’ed Siyaad Barre 26kii bishii January sanadkii 1991dii, wuxuu Max’ed Xaaji Ibrahim Cigaal shirarkii dib u heshiisiinta ee lagu qabtay magaalada Djibouti ee dalka Jibouti ee mar kale lagu soo doortay madaxweyne Cali Mahdi Max’ed, wuxuuna noqday wasiirkii dib u heshiisiinta ee dowladdii ra’iisul wasaare Cumar Carte Qaalib, wuxuuna si weyn uga soo horjeeday dhawaqii ka soo yeeray maamuleyaashii gobollada waqooyi ee jamhuuriyadda Soomaaliya.

16kii bishii May sanadkii 1993dii waxaa Max’ed Xaaji Ibrahim Cigaal loo doortay in uu hoggaamiyo maamulka Somaliland, wuxuuna ku guuleystay in uu hubka ka dhigo maleeshiyadii qabaa’ilka ku dhaqan gobollada waqooyi ee Soomaaliya, wallow uu dagaal uu dhiig fara badani ku daatay la galay hoggaamiyihii kaga horreeyay xilka C/raxmaan Axmed Cali “Tuur”, iyadoo dagaalkii ka dhacay magaalada Burco 1996kii ay hal maalin oo kaliya ku geeriyoodeen in ka badan 2.000 oo ruux oo isugu jira dhinacyadii dagaallamayay & dad rayid ah. Sidoo kale wuxuu ku guuleystay in lacag gaar ah u sameeyo ama u soo daabaco maamulka Somaliland & Passport aan caalamka wax aqoonsi ah ka helin intii uu noolaa & calan ka duwan kii ay sameystay Somaliland ka dib markii ay sheegeen in ay ka go’een Soomaaliya inteeda kale.

Max’ed Xaaji Ibrahim Cigaal wuxuu ku geeriyooday magaalada Pretoria ee dalka South Africa taariikhdu markii ay aheyd 03dii bishii May sanadkii 2002da, wuxuuna ku guuldarreystay in uu aqoonsi u helo maamulkii uu madaxda ahaa ee ku dhawaaqay in ay Soomaaliya ka go’day 18kii bishii May sanadkii, 1991kii.

Cigaal waxaa lagu aasay magaalada Berbera ee gobolka W/Galbeed ee Soomaaliya, waxaana la sheegay in ay aaskiisu ka soo qeybgaleen dad tiradooda lagu qiyaasay 3.000 oo ruux, waxaana xilkii uu ka geeriyooday buuxiyay G/Sare Daahir Riyaalle Kaahin oo ka mid ahaan jiray saraakiishii ciidamadii nabadsugidda ee dowladdii madaxweyne Max'ed Siyaad Barre, xilkaas oo uu hayo illaa maanta oo aan qorayo qoraalkan, isla markaana uu khilaaf xooggani kala dhaxeeyo ururrada kale ee siyaasadda ee ka jira deegaannadaas.

Dhinaca kale geeridii Cigaal ka dib, waxaa loogu magacdaray Airport-ka magaalada Hargeysa oo loo bixiyay Egal International Airport of Hargeysa.